cancion o texto del antiguo judeo-español.

Canciones orientales
(De "Temas sefardíes")

Mama, yo no tengo visto
pájaro con ojos mavís
rubio como la canela,
blanco como el yazimín.

¿Quién es ese pajarico
que en mi salón entró:
Pircuró hacerse nido
adientro de mi corazón.

Asentada en mi ventana
laborando el bastidor,
haber nuevo me trujeron
que el mi amor se desposó.

Desposátes, mi querido
confiticos me enviarás:
comeré con amargura
también con mucho dolor

A la una yo nací,
a las dos me engrandecí;
a las tres tenía amante,
a las cuatro me casí.

Dime, niña, dionde vienes,
que te quiero conocer
y si no tienes amante
yo te haré defender.

Abre este abajur, bijú,
abre la tu ventana;
por ver tu cara morena
al Dio daré mi alma.

Por la tu puerta yo pasí
y la topí cerrada,
la llavedura yo besí
como besar tu cara.

Una canción del Siglo de Oro
(De "Temas sefardíes")

Morena me llaman,
yo blanca nací
de pasiar galana
mi color perdí.

Morena me llama
el hijo del rey
si otra vez me llama
yo me vo con él.

Refranes
(De la revista Akí Yerushalayim)

Kuando el pishkado está en la mar, no invites djente a senar.
La ambre abolta el pan en karne.
Pan i keso kon amor y no geyna kon dolor.
Ken mete kara, kaza, y ken no, keda en kaza.
Asta ke al riko le viene la gana, al prove le sale l’alma.
Ni djustisia vale sin ley, ni ley sin djustisia.
Azno kayado, por sabio kontado.

Una conseja
(De Akí Yerushalayim)

Al tiempo de la Inkizision Espanyola, un djidio, ke los papazes avian konvensido con las buenas i con las "negras" a baftizarse, estaba asentado a la meza komiendo, viernes en medio día, kuando entró el papaz, ke estaba aziendo un djiro de inspeksion.

En efekto los papazes usaban ir a kontrolar si los djidios konvertidos se komportaban sigun las reglas de la nueva religion. Dunke el papaz entró y kualo vieron sus ojos? El djidio (ke ya no era mas djidio), esta asentado a la meza, enfrente de un buen poyo asado.

"Ma komo?", le disho el papaz, "estas comiendo karne oy? En día de viernes? No saves ke es defendido?". A esto el djidio respondio "Esto no es karne, es pishkado." "Komo?", le disho el papaz, "No eshtoy viendo yo ke es karne?". "No", le reshpondio el djidio. "Esto era karne, ma agora se izo pishkado", "Komo?", le respondio el papaz. "Muy simplemente; le echí enriva un poko de agua salada, le izi la de kuatro tres veces, y le dishi: "Eras karne i te izites pishkado; eras karne y te izites pishkado; eras karne y te izites pishkado. I se hizo pishkado, y agora es pishkado! Propio como me izites a mi kristiano, en baftizandome kon unas kuantas gotas de agua santa."